Kryeministri në detyrë, Albin Kurti, ka komentuar për herë të parë zhvillimet politike dhe ngërçin në Kuvend pas zgjedhjeve parlamentare të 9 shkurtit.

Gjatë fjalimit të tij në mbledhjen e Këshillit të Përgjithshëm të Lëvizjes Vetëvendosje të shtunën, Kurti theksoi se, pavarësisht mundësisë për përsëritjen e zgjedhjeve, rezultati nuk mund të ndryshohet, përveçse mund të thellohet në favor të VV-së.

“Zgjedhjet mund të përsëriten, por rezultati jo vetëm që mund të ripërsëritet, por edhe të thellohet për Vetëvendosjen”, tha ai.

Kurti theksoi se konstituimi i Kuvendit është hapi i parë dhe se pas tij duhet të formohet qeveria.

Ai e bëri të qartë se Kosova ka tashmë një qeveri funksionale, me ministra dhe kryeministër në detyrë, por që Kuvendi ende nuk është funksional.

Kurti gjithashtu shprehu shqetësimin për bllokimin e konstituimit të Kuvendit, duke theksuar se ndonëse votohet shpesh në mënyrë të fshehtë, deputetët e opozitës nuk po e mbështesin këtë mënyrë për zgjedhjen e Albulena Haxhiut si kryetare të Kuvendit./Arbresh.info