Është dita e dytë e vizitës së tij zyrtare në  Tokio të Japonisë.

Kryeministri i Kosovës, Albin Kurti ka takuar sot homologun e tij japonez, kryeministrin, Fumio Kishida.

Kurti përmes Facebook-ut ka bërë të ditur se gjatë këtij takimi ka diskutuar me Kishidan për të arriturat socio-ekonomike të Kosovës dhe interesimin për investime nga Japonia.

Po ashtu Kurti bënë të ditur se ka konfirmuar pjesëmarrjen e Kosovës në EXPO Osaka 2025, shkruan arbresh.info.

“Në ditën e dytë të qëndrimit në Tokio, në rezidencën shtetërore në Pallatin Akasaka, na priti për vizitë Kryeministri i Japonisë, Fumio Kishida. I shpreha edhe njëherë ngushëllime në emër të popullit dhe qeverisë së Kosovës për vdekjen tragjike të ish Kryeministrit Shinzo Abe, si dhe e falënderova për ndihmën e mbështetjen e vazhdueshme japoneze për zhvillimin e Kosovës”, shkruan Kurti.

I pari i qeverisë shkruan se kryeministri japonez ka përcjell përshëndetjet e tij për popullin e Kosovës, kurse Kurti e ka ftuar atë ta vizitojë Kosovën në një të ardhme të afërt.

“Tregova për të arriturat socio-ekonomike të Kosovës dhe interesimin tonë për investime nga Japonia, teksa konfirmova pjesëmarrjen tonë në EXPO Osaka 2025. Japonia është vend shumë i rëndësishëm i G7, me të cilën ne ndajmë pikëpamje të njëjta vlerore dhe strategjike. Në fund të takimit Kryeministri Kishida më tha të përcjell përshëndetjet e tij për popullin e Kosovës, kurse unë e ftova ta vizitojë Kosovën në një të ardhme të afërt”, shkruan Kurti nga Japonia.

Ndryshe, kryeministri i Republikës së Kosovës, Albin Kurti, më 26 shtator ka udhëtuar për në Japoni për të marrë pjesë në ceremoninë shtetërore të varrimit të ish-kryeministrit të Japonisë, Shinzo Abe./arbresh.info/