Kryeministri i Kosovës, Albin Kurti, ka reaguar lidhur me ekspozitën për masakrat e luftës në Kosovë, duke theksuar nevojën që ajo të korrigjohet dhe të rikthehet në një formë më të saktë dhe gjithëpërfshirëse.

Ai bëri të ditur se ekspozita tashmë është larguar nga sheshi, ndërsa shtoi se, megjithëse përfshin disa raste të rëndësishme, ajo ka pasur mangësi dhe gabime në përmbajtje që duhet patjetër të përmirësohen.

Kurti theksoi se dokumentimi dhe prezantimi i saktë i krimeve të luftës është thelbësor, jo vetëm për opinionin ndërkombëtar, por edhe për vetë shoqërinë kosovare, veçanërisht për gjeneratat e reja që nuk e kanë përjetuar luftën.

Sipas tij, një pjesë e madhe e popullsisë ose kanë qenë fëmijë gjatë luftës, ose kanë lindur pas saj, prandaj është e domosdoshme që e vërteta historike të ruhet dhe të prezantohet në mënyrë të drejtë.

Ai vlerësoi se një ekspozitë e tillë ka rëndësi të veçantë për të ardhmen e vendit, pasi ndihmon në ruajtjen e kujtesës kolektive dhe në ndërgjegjësimin për çmimin e lartë të lirisë, duke theksuar se shumica e viktimave të luftës në Kosovë kanë qenë civilë.

“Kjo ekspozitë është shumë e rëndësishme për të ardhmen tonë jo vetëm për të kaluarën tonë. Ndërkaq, është e rëndësishme edhe për aspektin ndërkombëtar, sepse ne dëshirojmë që bota me të cilën kemi ndërveprim të dendur të mos harroj asnjëherë se çmimi i lirisë dhe i pavarësisë ishte shumë i lartë dhe në veçanti në popullsinë civile, sepse shumica dërrmuese e të vrarëve në Kosovë janë popullsi civile”, deklaroi ai.

Kryeministri u shpreh se një ekspozitë e rishikuar dhe e bazuar në fakte duhet të rikthehet sa më shpejt, duke sugjeruar muajin qershor, në përvjetorin e çlirimit të Kosovës, si një moment të përshtatshëm.

“Një ekspozitë e saktë e drejtë dhe e plotë mbi të gjitha e vërtetë për krimet e kryera të Serbisë në Kosovë, unë besoj që duhet të rikthehet sa më parë. Madje, një datë optimale do të ishte qershori, përkatësisht koha kur shënojmë përvjetorin e 27-të të çlirimit të Kosovës”, deklaroi ai në konferencë për media pas mbledhjes së Qeverisë.

Ai shtoi gjithashtu se një nismë e tillë nuk duhet të kufizohet vetëm në Prishtinë, por të shtrihet në të gjitha komunat e vendit, në mënyrë që të jetë sa më e qasshme për qytetarët.