Kryeministri i Kosovës, Albin Kurti takoi kryeministren e Finlandës, Sanna Marin

Në Samitin mes vendeve të Ballkanit Perëndimor dhe Bashkimit Evropian, i cili u mbajt në Brdo të Sllovenisë, kryeministri i Republikës së Kosovës, Albin Kurti, pas takimeve plenare takoi Kryeministren e Finlandës, Sanna Marin.

Në takimin e përbashkët me zëvendëskryeministren, njëherit Ministren e Punëve të Jashtme, Donika Gërvalla dhe Ministrin e Financave Hekuran Murati, u bisedua për marrëdhëniet e mira bilaterale mes dy vendeve.

Kryeministri Kurti falënderoi Kryeministren Marin për kontributin e Finlandës për Kosovën para dhe pas shpalljes së pavarësisë. Ai po ashtu theksoi nevojën për bashkëpunim më të madh ekonomik dhe investime në Kosovë.

Qeveria e Kosovës është e fokusuar në luftimin e korrupsionit përmes sundimit të ligjit dhe rritjen e punësimit përmes krijimit të kushteve më të mira për investitorë, shtoi Kryeministri Kurti.

Kryeministrja Marin shprehu mbështetjen për programin e qeverisë për punë dhe drejtësi, dhe ofroi mbështetjen e Finlandës për integrimin e Kosovës në Bashkimin Evropian./arbresh.info/