Kryeministri i Kosovës, Ramush Haradinaj ka reaguar për letrën e presidentit amerikan Donald Trump dërguar presidentit të Kosovës, Hashim Thaçit përmes të cilës ShBA mbështetë marrëveshjen mes Kosovës dhe Serbisë.

Haradinaj e ka mbështetur çdo përpjekje për unifikim të qëndrimeve të spektrit politik për marrëveshjen gjithëpërfshirëse ndërmjet Kosovës dhe Serbisë.

“Si Kryeministër i Qeverisë së Kosovës mbështes fuqishëm çdo përpjekje për unifikim të qëndrimeve të spektrit politik dhe përgatitjeve të shpejta për përmbylljen e marrëveshjes gjithpërfshirëse ligjërisht obligative ndërmjet dy shteteve, Kosovës dhe Serbisë”, ka shkruar ndër të tjera Haradinaj në llogarinë e tij në Facebook.

Postimi i plotë i Haradinajt:

Letra e Presidentit Trump është lajm i mirë për shtetin dhe popullin e Kosovës. ShBA që nga fillimi ka qenë dhe vazhdon të jetë përkrahësja më e fuqishme e shtetit të Kosovës, sovranitetit dhe integritetit territorial të saj. Si Kryeministër i Qeverisë së Kosovës mbështes fuqishëm çdo përpjekje për unifikim të qëndrimeve të spektrit politik dhe përgatitjeve të shpejta për përmbylljen e marrëveshjes gjithpërfshirëse ligjërisht obligative ndërmjet dy shteteve, Kosovës dhe Serbisë.