Ndonëse ndihma e Caritas-it gjerman në Kosovë që nga periudha e luftës ka qenë e madhe, edhe më tutje ata nuk do të ndalen së ndihmuari shtetin e Kosovës. Kështu u tha sot në një konferencë për media, të organizuar nga Ipeshkvia e Kosovës, ku pritën për vizitë Kardinalin e Kolnit të Gjermanisë, Reiner Maria Woelke dhe Presidentin e Caritas-it gjerman, Peter Meher.

Vizita e Caritas-it gjerman në Kosovë u është dedikuar vendeve ku kjo organizatë ka ndarë ndihma më të mëdha që 16 vite, të cilat do të përkrahen në projektet e ardhshme.

Kardinali dhe Presidenti i Caritas-it gjerman, gjatë kësaj vizite ndanë kohë që të vizitojnë fshatin Celinë të Rahovecit, në të cilin vend pas luftës, kishin ndihmuar në ndërtimin e një shkolle dhe dyqind shtëpive për banorët e këtij fshati.

Me këtë rast, Kardinali Rainer Maria Woelke, tha se gjatë kësaj vizite ka përjetuar gjëra shumë pozitive nga njerëzit e Kosovës. Ai vlerësoi lartë profesionalizmin e Caritas-it të Kosovës. Woelke po ashtu theksoi se me rastin e vizitës në Celinë është prekur thellë nga mirënjohja e banorëve të këtij fshati.

Ndërkaq, presidenti i Caritasit gjerman, Peter Neher, tha se Caritasi i Kosovës ka kryer një punë të jashtëzakonshme brenda vendit. Kurse, theksoi se përkrahja e Caritasit gjerman për atë të Kosovës nuk do të mungojë asnjëherë.

Përfaqësuesit e Caritasit gjerman vlerësuan që Kosova është zhvilluar shumë nga vitet e pas luftës, ndonëse qytetarët e saj nuk mund ta vërejnë këtë.

Ata kërkuan nga qytetarët e Kosovës që të mos e lëshojnë vendin e tyre, për të shkuar në vende të tjera, pasi që Caritasi gjerman po mundohet maksimalisht që të krijojë perspektivë të madhe për qytetarët e saj, në mënyrë që mundësia për punë të ofrohet këtu dhe jo në vende tjera.