Kosova po e fiton gradualisht luftën kundër Etheve Hemorragjike Krime Kongo. Kështu u tha në takimin e Këshillit Ndërministror për parandalimin dhe luftimin e Etheve Hemorragjike Krime-Kongo që po mbahet sot në Malishevë, nën kryesimin e Ministrit të Shëndetësisë dhe njëherësh kryesues i Këshillit, Imet Rrahmani.

Fakti që në tre vitet e fundit në Kosovë (me theks të veçantë në zonat endemike: Malishevë, Rahovec, Klinë dhe Suharekë), nuk ka pasur asnjë të vdekur nga EHCC, flet për një rezultat të mirë, falë koordinimit të mirë midis faktorit politik (pushtetit) lokal e qendror dhe profesionistëve shëndetësorë.

Ministri i Shëndetësisë, Imet Rrahmani, duke përgëzuar si pushtetin qendror në komunat endemike ashtu edhe atë qendror dhe profesionistët nga fusha e shëndetësisë, veterinës, bujqësisë dhe fushat e tjera, tha se mbajtja e takimit në Malishevë, ishte një ide për të falënderuar kështu komunitetin për angazhimin dhe bashkëpunimin e mirë midis niveleve në luftimin me sukses të EHCC.

“Fakti që qe tre vjet nuk kemi asnjë viktimë nga EHCC flet për rezultate të mira të arritura së bashku. Unë jam i përkushtuar që punët e mira t’i shtyjmë para dhe një prej këtyre punëve ishte edhe puna e Këshillit Ndërministror për EHCC”, tha Ministri Rrahmani, duke theksuar se takimi në Malishevë ishte ide që qytetarët e kësaj komune dhe vet rajoni, ta ndiejnë praninë e pushtetit dhe përkrahjen për t’u ballafaquar me sukses me EHCC.

Tashmë që përvojën e kemi përpara, tha më tej Ministri Rrahmani, uroj që edhe vitin tjetër të flasim për një vit pa viktima, e gjithashtu edhe në vitet në vijim, në mënyrë që “kjo sëmundje të mbetet pastaj si histori”.

Kryetari i Komunës së Malishevës, Ragip Begaj, tha puna e përbashkët dhe koordinimi i mirë midis nivelit qendror dhe atij lokal, ka bërë që qytetarët e Malishevës ta heqin frikën nga një e keqe që ka dominuar me vite.

“Puna e përbashkët ka bërë që, përkundër faktit që sivjet ka pasur mbi 1333 thumbime, të mos kemi asnjë rast të vdekjes, sikurse edhe dy vitet e kaluara dhe kjo pa dyshim që është një fitore e përbashkët”, tha kryetari Begaj.

Ai tha se rezultatet e tre viteve të fundit janë një fitore që dëshmon se puna profesionale me përkrahjen edhe të pushtetit rezulton me sukses të përbashkët.

“Është shumë e rëndësishme që qytetarët e Malishevës ta ndiejnë se e kanë larguar rrezikun nga rriqrat dhe besojmë që sukseset do të vazhdojnë edhe në vitet në vijim”, tha Begaj.