Ministri i Drejtësisë, Hajredin Kuçi u takua me ministrin për Çështje Vendore të Shqipërisë, Bledi Çuçi, më të cilin diskutuan  për pikat e përbashkëta të përkushtimit të dy shteteve Kosovë – Shqipëri.

Gjatë takimit  u diskutua për fuqizimin e rendit dhe ligjit, ashpërsimin e luftës kundër korrupsionit, si dhe bashkëpunimin në fusha të caktuara, si në legjislacion, ashtu edhe në shkëmbimin e të dhënave mes noterëve, bartjen e evidencave dhe arritjen e  marrëveshjeve të përbashkëta në kuadër të iniciativave rajonale dhe globale, thuhet në një komunikate për media nga MD.

“Si dy shtete jemi duke angazhuar dhe përkushtuar për rend dhe ligj, për  integrim evropian si dhe integrim të përbashkët rajonal. Bashkëpunimi Kosovë – Shqipëri, i ndihmon tërë rajonit, por në veçanti, i ndihmon popullit tonë pranë integrimeve rajonale dhe si rezultat rajoni duhet ta ketë shembull këtë bashkëpunim”, ka thënë Kuçi.

Ministri Kuçi gjithashtu ka theksuar që është e nevojshme edhe inkurajimi i punës së përbashkët mes prokurorëve të Kosovës dhe Shqipërisë lidhur me investigimin dhe adresimin e krimeve kibernetike dhe atyre financiare.

Në anën tjetër, Ministri Çuçi, ka vlerësuar angazhimet e përbashkëta, në veçanti në luftën kundër korrupsionit si dhe në intensifikimin e bashkëpunimit në mes të pushteteve vendore të këtyre dy vendeve.