Njësia Rajonale për Trafik Rrugor në Prizren, gjatë angazhimeve të përditshme në kuadër të rritjes së sigurisë në komunikacionin rrugor, ka ndërmarrë disa veprime operative në rajonin e saj të përgjegjësisë, me ç ‘rast janë konfiskuar gjithsej 11 patentë shoferë, si rezultat i kundërvajtjeve të ndryshme.

Në njoftim thuhet se tre patentë shoferë janë konfiskuar për shkak të tejkalimit në vijë të plotë, në segmentin rrugor Suharekë – Carralevë.

Shkeljet janë dokumentuar përmes video-incizimit nga kamera e veturës me radar mobil, përcjell Arbresh.info

Shtatë patentë shoferë janë konfiskuar për mosrespektim të dritës së kuqe në semafor, gjatë një aktiviteti operativ të realizuar nga ora 08:20 deri në 09:00, në rrugën “Wesli Klark” në Prizren.

Një patentë shofer është konfiskuar për shkak se një fëmijë ishte i ulur në ulësen e përparme, gjë që përbën rrezik serioz për sigurinë e fëmijës dhe shkelje të dispozitave ligjore për transportin e fëmijëve në automjete.

“Policia e Kosovës apelon tek të gjithë pjesëmarrësit në trafik që të respektojnë rregullat dhe ligjet e komunikacionit rrugor, me qëllim të ruajtjes së jetës dhe sigurisë së të gjithëve”, thuhet në njoftim./Arbresh.info