Komandanti i misionit paqeruajtës të NATO-s në Kosovë, KFOR, gjeneralmajor Enrico Barduani u takua sot në Beograd me kreun e ushtrisë së Serbisë, Milan Mojsiloviq si dhe me përfaqësuesit e shteteve të Kuintit, ka bërë të ditur KFOR-i përmes një komunikate.

Sipas njoftimit ata ndanë pikëpamje mbi situatën e sigurisë dhe bënë një vlerësim të përpjekjeve të tyre përkatëse.

“Ne kemi një bashkëpunim të gjatë me Forcat e Armatosura Serbe dhe unë jam plotësisht i përkushtuar për të ndërtuar mbi këtë gjatë gjithë pjesës tjetër të mandatit tim; bashkëpunimi i vazhdueshëm, dialogu dhe shkëmbimi i informacionit janë të dobishme për të dyja palët dhe janë çelësi i stabilitetit rajonal”, citon komunikata komandantin e KFOR-it.

Gjeneral Major Barduani u takua gjithashtu me përfaqësuesit diplomatikë të Francës (Pierre Cochard), Gjermanisë (Carsten Meyer-Wiefhousen), Italisë (Luca Gori), Mbretërisë së Bashkuar (Edward Ferguson) dhe Shteteve të Bashkuara të Amerikës (Alexander Titolo) në Serbi në një takim të Grupit të QUINT-it, në të cilin mori pjesë edhe Shefi i Delegacionit të BE-së në Serbi (Ambasadori Emanuele Giaufret).

“Ai i informoi ata mbi aktivitetet e KFOR-it dhe mbi bashkëpunimin e vendosur të misionit me Komunitetin Ndërkombëtar, duke përfshirë edhe mbështetjen e palëkundur për dialogun e lehtësuar nga BE-ja për normalizimin e marrëdhënieve midis Beogradit dhe Prishtinës. Këto takime ishin pjesë e ndërveprimeve të rregullta të Komandantit të KFOR-it me homologët e tij kryesorë në të gjithë rajonin e Ballkanit Perëndimor”, thuhet tutje në komunikatën e KFOR-it.