Komisioni për mbikëqyrjen e financave publike, ka kërkuar që të bëhet sa më parë auditimi i partive politike, për tri vitet e fundit, pasi që kjo është jo vetëm nën interesin e këtij komisioni, por dhe të opinionit të gjerë.

Zëvendëskryetar i parë Ali Sadriu, tha se komisioni i ka kryer obligimet e tyre, ku edhe i është dërguar kërkesë Kuvendit të Kosovës, kërkesë kjo e cila është miratuar, por nuk ka gjetur zbatim në praktikë.

 “Komisioni planifikon përgatitjen e termeve të referencave për auditimin e pasqyrave financiare, dhe të deklarimit financiar të subjekteve politike. Këtu ju e dini që ne e kem pas si komision temë shqyrtimi, disa herë keme tentu ku ka prezentu edhe sekretari kom qenë i interesuar edhe në këtë takim të jetë sepse auditimi nuk ka ndodh tek subjektet politike dhe është diçka që opinionit i intereson, dhe na intereson të gjithë neve”, pohoi Sadriu

Ndërsa Hajdar Beqa, anëtar i Komisionit nga radhët e PDK-së, tha se është e pa kuptimtë që organizatat buxhetore të mos auditohen, pasi që ato shpenzojnë paratë publike pa pasur kontrolle.

Por jo vetëm këto janë problemet me të cilat përballet komisioni. Komisioni për Mbikëqyrjen e Financave Publike, vazhdon të funksionojë pa praninë e kryetarit Besnik Bislimi, i cili si anëtar i Vetëvendosjes, vazhdon t’i bojkotojë komisionet.

Por anëtarët e komisionit patën një kërkesë për zëvendësimin e tij, pasi që mungesa e tij po pengon punën e komisionit.

Ali Sadriu tha se duhet që ta zgjedhin dikë tjetër kryetar të këtij komisioni, pasi që mungesa e tij po e zvarrit punën e komisionit, i cili vazh don të jetë në funksion të opozitës.

E nuk munguan as komentet që në rast se Besnik Bislimi, do të jetë i pranishëm në komision, atë do ta largojnë nga Lëvizja Vetëvendosje, pjesë e së cilës është ai.