Keqtrajtimi dhe tejkalimi i kompetencave nga ana e zyrtarëve policorë është vënë në dukje kohëve të fundit.

Një zyrtar policor ka përfunduar në pranga të hetuesve të Inspektoratit Policor të Kosovës (IPK), nën dyshimin se ka tejkaluar autorizimit policor dhe duke keqtrajtuar një qytetar në Lipjan, shkruan arbresh.info.

“Inspektorati Policor i Kosovës (IPK),respektivisht Departamenti i Hetimeve më 1 shkurt të këtij viti kishte pranuar një ankesë nga një qytetar, i cili pretendonte për tejkalim të autorizimeve policore gjatë përdorimit të forcës nga disa zyrtarë policorë në Lipjan. Hetuesit e IPK-së pas pranimit të ankesës nga qytetari si dhe shkresat e rastit kanë ndërmarrë një mori veprimesh hetimore”, njofton IPK.

Pas disa veprimeve hetimore në konsultim me prokurorinë kompetente, hetuesit e IPK-së kanë arrestuar sot një zyrtar policor (punonjës në Stacionin Policor të Lipjanit) që ishte i përfshirë në këtë incident.

“Arrestimi i tij është bërë me dyshimin se i njëjti ka kryer veprën penale “keqtrajtim gjatë ushtrimit të detyrës zyrtare” kurse me vendim të prokurorit të njëjtit i është caktuar masa e ndalimit për 48 orë si dhe është suspenduar nga detyra”, bënë të ditur IPK, shkruan arbresh.info.

Hetuesit e IPK-së pritet të ndërmarrin edhe veprime të tjera hetimore në konsultim të vazhdueshëm me prokurorin përgjegjës për të sqaruar rrethanat e këtij incidenti./arbresh.info/