Në vazhdën e takimeve të Komisionit Evropian dhe Qeverisë së Kosovës, përfaqësuar nga Ministria për Integrime, në kuadër të Dialogut për Procesin e Stabilizim-Asociimit (DPSA), sot u diskutua për çështjet e brendshme tregtare, konkurrencën, shëndetësinë dhe mbrojtjen e konsumatorëve.

Sipas komunikatës së përbashkët të Ministrisë së Integrimeve dhe Komisionit Evropian, lidhur me shëndetësinë, të dyja palët u pajtuan se është rëndësishme që Kosova të krijojë një sistem shëndetësor të qëndrueshëm, ekonomik dhe të orientuar kah pacientët, duke e sjell atë më afër standardeve të sigurisë dhe cilësisë të njohur ndërkombëtarisht.

U theksua se krijimi i Fondit të Sigurimit Shëndetësor është një hap vendimtar për ta realizuar këtë, ashtu siç është edhe investimi i mëtejshëm në promovimin e jetës së shëndetshme, parandalimin e sëmundjeve dhe mbrojtjen e popullsisë nga kërcënimet shëndetësore të rënda ndërkufitare.

Ndërsa, lidhur me mbrojtjen e konsumatorëve, Komisioni i ka dhënë një vërejtje Qeverisë, duke nënvizuar nevojën për rritjen e vetëdijesimit dhe trajtimin e duhur të ankesave të konsumatorëve.

Po ashtu, komisioni ka ritheksuar nevojën e themelimit të Këshillit Kombëtar për Inspektim dhe rishikimin e sistemit për mbikëqyrjen e inspektorateve.

Sa i përket lëvizjes së kapitalit, shërbimeve financiare dhe ligjit për kompanitë, Komisioni dhe autoritetet e Kosovës u pajtuan për nevojën e avancimit të legjislacionit dhe të zbatimit të tij. Komisioni theksoi nevojën që të shqyrtohet mundësia për përafrimin e taksës së korporatave të sigurimeve me ato të industrive të tjera.