Policia e Kosovës ka njoftuar për dy raste të ndara të kalimit të paautorizuar të kufirit me Serbinë, të regjistruara gjatë 24 orëve të fundit.

Rasti i parë ka ndodhur në fshatin Koshuticë, në komunën e Leposaviqit, rreth orës 11:55, shkruan Arbresh.info.

Sipas policisë, i dyshuari është liruar në procedurë të rregullt.

“Koshuticë, Leposaviq / 18.01.2025 – 11:55. Njësiti policor gjatë patrullimit kanë ndaluar një veturë të cilën e drejtonte i dyshuari mashkull kosovar nën dyshimin se i njëjti ka kaluar ilegalisht kufirin. Në konsultim me prokurorin pas inicimit të rastit i dyshuari është liruar në procedurë të rregull.”, thuhet në raportin e policisë.

Rasti i dytë është regjistruar në fshatin Bube, Zubin Potok, po të njëjtën ditë, rreth orës 21:30.

Autoritetet ndaluan një automjet me targa serbe (“BG”), ku ndodheshin katër të dyshuar meshkuj serbë.

Ata dyshohet se kishin kaluar ilegalisht kufirin nga Republika e Kosovës në Serbi dhe anasjelltas.

Edhe në këtë rast, me vendim të prokurorit, të dyshuarit u liruan për procedurë të rregullt hetimore.

Policia e Kosovës mbetet e përkushtuar për të monitoruar dhe parandaluar veprimet që cënojnë sigurinë kufitare të vendit.