Përfaqësuesja e Lartë e Bashkimit Evropian për Punët e Jashtme dhe Politikën e Sigurisë, Kaja Kallas, gjatë një vizite zyrtare në Serbi ka përsëritur se rruga drejt anëtarësimit në BE kërkon përkushtim të vërtetë dhe zbatim të reformave thelbësore.

Në një konferencë për media, Kallas theksoi se anëtarësimi në Bashkimin Evropian është një qëllim strategjik për Serbinë, por kërkoi që fjalët të shoqërohen me veprime konkrete.

“Nga diskutimet e mia me udhëheqjen politike të Serbisë, është e qartë se anëtarësimi në Bashkimin Evropian mbetet një qëllim strategjik. Por dua të theksoj se duhet të shohim edhe veprime që do të mbështesin këto fjalë. Reformat janë mënyra se si Serbia do të përparojë në rrugën e saj evropiane. Nuk ka rrugë të shkurtra drejt anëtarësimit. Duhet të bëhet përparim i vërtetë. Dhe hapat e ardhshëm janë shumë të qartë. Ato përfshijnë liritë e medias, luftën kundër korrupsionit, reformat zgjedhore. Reformat duhet të jenë realiste, jo vetëm të shënohen në letër”, deklaroi Kallas.

Ajo theksoi se reformat nuk janë vetëm domosdoshmëri për BE-në, por do të sjellin përfitime konkrete për qytetarët e Serbisë:

“Këto reforma do t’u sjellin përfitime të vërteta qytetarëve të Serbisë dhe qindra mijëra protestues e kanë kërkuar këtë në javët e fundit. Pavarësia e universiteteve duhet të respektohet”, tha Kallas, raporton N1.

Kallas shtoi se ky është një moment kyç për zgjerimin e BE-së në Ballkanin Perëndimor, dhe BE-ja është e përkushtuar ta shfrytëzojë këtë fazë vendimtare.

“Jam thellësisht e përkushtuar për të ndihmuar të gjithë Ballkanin Perëndimor të shfrytëzojë këtë moment aktual për zgjerimin. Po, ky proces ka vazhduar për një kohë të gjatë, por gjithmonë ka moment politik dhe është pikërisht këtu. Një Evropë e bashkuar është një vizion drejt të cilit të gjithë duhet të punojmë.”

Në bisedimet me zyrtarët serbë, Kallas tha se është trajtuar edhe çështja e sigurisë kufitare, marrëdhëniet me fqinjët dhe dialogu me Kosovën.

“Kjo nuk ka të bëjë vetëm me përmirësimin e lidhjeve, por është thelbësore për të ardhmen e Serbisë. Është koha për të kapërcyer të kaluarën dhe për të punuar për një të ardhme të përbashkët. U bëj thirrje përfaqësuesve të Beogradit dhe Prishtinës të vijnë në Bruksel sa më shpejt të jetë e mundur dhe të diskutojnë hapat konkretë përpara”, tha ajo./Arbresh.info