Deputetja e AAK-së Time Kadrijaj, rikonfirmoi qëndrimin e kësaj partie se nuk do ta votojë Albulena Haxhiun për kryeparlamentare.

“Aleanca mban qëndrimin e njëjtë, nuk do ta votojmë kandidaten e VV-së. Ne nuk e dimë edhe cili do të jetë kandidatja apo kandidati. Ftesa në mënyrën që është bërë nuk është korrekte, sepse e ka balancuar zgjedhjen e kryetarit me zgjedhjen e nënkryetarit. Nuk besoj qe do të kishim shkuar në takim”, tha Kadrijaj.

Kadrijaj, ka thënë se qytetarët duhet ta dinë se Lëvizja Vetëvendosje është ajo që po bllokon konstituimin e Kuvendit.

Sipas saj, AAK-ja ka propozuar dy emra (Saranda Bogujevcin ose Shqipe Selimin) për t’i votuar për kryeparlamentare, por siç thotë ajo, VV-ja nuk po do të dalë nga kriza.

“S’kemi votë në këto rrethana. Për zhbllokimin e kësaj situate kemi propozuar dy emra, por nuk po duan. Edhe partitë e tjera kanë shprehur gatishmëri të votojnë tjetër kandidat. Qytetarët duhet ta dinë se VV-ja është bllokuese e konstituimit të Kuvendit”, ka deklaruar Kadrijaj.

Tutje, ajo u shpreh se edhe nëse do të ishin të ftuar në takimin e sotëm nga Kurti nuk do të kishin shkuar.

“Është obligim i VV-së t’i sigurojë 61 vota. Ftesa që iu ka bërë PDK-së e LDK-së nuk kam menduar se është ftesë korrekte sepse ka balancuar zgjedhjen e kryeparlamentarit me të nënkryetarëve. Janë procedura të ndryshme. Nuk do të kishim shkuar në takim. I dini qëndrimet tona”, ka thënë Kadrijaj.

Në takim LDK-ja e refuzoi pjesëmarrjen, ndërsa PDK-ja u takua, por nuk arritën ndonjë marrëveshje.