Komandanti i Forcës së Sigurisë së Kosovës, Bashkim Jashari priti në takim Komandantin e Batalionit 1-133 të Gardës Kombëtare të Ajovës, Nënkolonel Matthew Parrino, i cili është duke zhvilluar një aktivitet bilateral në Forcën e Sigurisë së Kosovës.

Parrino do të vëzhgojë nga afër përgatitjet e Kompanisë A të Regjimentit të Parë të Këmbësorisë për zbarkim në JRTC (Joint Readiness Training Center) në SHBA.

“Njëkohësisht ekipi nga Garda e Ajovës së bashku me ekipin e FSK-së do të bëjë validimin e togut pas realizimit të detyrave përkatëse’, thuhet në njoftimin e FSK-së.

Sipas tyre, në këtë takim u diskutua edhe mundësia e avancimit të bashkëpunimit në nivel taktik dhe operacional me Gardën Kombëtare të Ajovës.

Njëkohësisht Komandanri i FSK-së ka kërkuar nga Parrino që përkushtimi të jetë i lartë në ngritjen standardeve të validimit njëjtë sikur në njësitë e Ushtrisë Amerikane.

“Në fund të takimit Gjeneral Jashari theksoi rëndësinë e bashkëpunimit në nivele të ndryshme me Gardën Kombëtare të Ajovës dhe përkushtimin nga ana e FSK-së për të shërbyer krah për krah me trupat amerikane”, thuhet në njoftimin e FSK-së.