Komuna e Skenderajt këtë vit nuk do të dekorojë qytetin për festat e fundvitit.

Kështu bën të ditur kryetari i kësaj komune, Bekim Jashari, shkruan portali arbresh.info

Si arsyetim ai thotë se për shkak të situatës me pandemi, prioritet duhet të jenë përkrahjet me pako ushqimore e higjienike për familjet në nevojë.

“Marrë parasysh gjendjen pandemike në të cilën gjendemi, gjendjen ekonomike në vend dhe prioritetin tonë që përkrahjen me pako ushqimore e higjienike për familjet në nevojë të vazhdojmë sipas kërkesave dhe nevojave në teren, kam vendosur që këtë vit për festat e fundvitit të mos dekorojmë sheshin “Adem Jashari” dhe qytetin tonë në përgjithësi”, thuhet në shkrimin e Jasharit.

Në vend të dekorimit mjetet financiare do të përdoren për menaxhimin e situatës pandemike dhe në përkrahje të familjeve në nevojë.

“Mjetet financiare të parapara për dekorimin e qytetit për festat e fundvitit do të shfrytëzohen për menaxhimin e situatës pandemike, në përkrahje të familjeve në nevojë”, tutje thotë ai./arbresh.info/