Kryetare e re e Degës së Lidhjes Demokratike të Kosovës (LDK) në Prishtinë, është zgjedhur sot Donjeta Dragusha.

Deri me sot, në këtë postë ka qenë Ismet Beqiri, teksa kryetari i LDK-së, Lumir Abdixhiku ka njoftuar për largimin e tij, dhe zgjedhjes e kryetares së re, shkruan Arbresh.info.

Abdixhiku përmes një postimi në Facebook, ka falënderuar Beqirin për 21 vite të udhëheqjes së degës së LDK-së në Prishtinë, ndërsa Dragushës i ka uruar suksese.

Postimi i plotë i Abdixhikut:

Ismet Beqirin e falënderova për 21 vite udhëheqje të degës së parë në Prishtinë. Të faleminderit për gjithë kontributin e dhënë Ismet! Një rrugëtim i gjatë e përplot histori.

Nga sot, Donjeta Dragusha, një grua profesioniste, veprimtare burimore nga forumet tona, magjistre e shkencave të ekonomisë, e asambleiste e zgjedhur në kryeqytet, u zgjodh si kryetare e re e kësaj dege.

Donjetës dhe ekipit të saj të ri udhëheqës, i uroj çdo sukses. Do të kenë edhe mbështetjen edhe kurreshtjen tonë në secilin proces.

Sonte, me këtë Kuvend, mbyllëm procesin zgjedhor në kryeqytet. Mbi 5500 pjesëmarrës në 86 nëndegë, rekord i post-pavarësisë; përplot entuziazëm, mobilizim e energji. Drejt Kuvendit të 19 nëntorit. Le të ketë festë. Le të ringritemi si një./Arbresh.info