Ish-drejtori i Trepçës, deputeti aktual i PDK-së Ferat Shala ka kujtuar grevën e minatorëve të vitit 1989. Shala ka thënë se askush më shumë se minatorët nuk ia din vlerën lirisë e pavarësisë.

Deputeti përmes një postimi në ‘facebook’ i ka quajtur minatorët e Kosovës edhe si promotor të zhvillimeve të rëndësishme historike për vendin.

“Minatorët e Kosovës, promotor të zhvillimeve të rëndësishme historike për vendin!

Në përvjetorin e grevës historike të minatorëve, shprehim respektin dhe me krenari sjellim në kujtesën tonë kontributin dhe sakrificën e minatorëve në të gjitha periudhat historike të Kosovës.

Me rastin e shënimit të kësaj ngjarje rikujtojmë punën, angazhimin dhe kontributin e minatorëve që dhanë ndër vite, duke qenë simboli i punës, sakrificës dhe protagonistë të proceseve të rëndësishme historike të lëvizjes për çlirim.

Askush më shumë se minatorët nuk ia di vlerën lirisë dhe pavarësisë, sepse ata ishin gjithmonë krahë i fortë dhe i pathyeshëm për të mbrojtur ekzistencën e Kosovës. Ata ditën t’i dalin zot Kosovës në ditët më të vështira.

Greva e minatorëve e vitit 1989, nuk ishte thjeshtë vetëm një grevë qëndrese dhe revolte por ishte një lëvizje politike e kohës, në mbrojtje të lirive dhe të drejtave politike të shqiptarëve të Kosovës”. /arbresh.info/