Ish-ministri i jashtëm i Kosovës, Enver Hoxhaj, ka përkujtuar sot Masakrën e Krushës së Madhe, duke e cilësuar atë si një nga dëshmitë më të rënda të gjenocidit serb mbi popullin shqiptar.

Në një postim në Facebook, ai ka shprehur dhimbjen dhe respektin për sakrificën e popullit të Kosovës, duke theksuar se kjo masakër na rikujton çmimin e lartë të lirisë dhe pavarësisë.

“Sot përkujtojmë me dhimbje sakrificën e Krushës së Madhe, epiqendrën e dhimbjes dhe krenarisë sonë kombëtare. Masakra atje mbetet një nga dëshmitë më të rënda të gjenocidit serb mbi popullin tonë, duke na rikujtuar çmimin e lartë të lirisë dhe pavarësisë së Kosovës. Nderimi ynë sot është edhe një zotim se sakrifica e dëshmorëve, martirëve dhe viktimave kurrë nuk do të harrohet. Lavdi dëshmorëve dhe martirëve të Krushës së Madhe!”, ka shkruar Hoxhaj.

Masakra e Krushës së Madhe është një nga krimet më të rënda të luftës në Kosovë, ku mbi 240 civilë shqiptarë u vranë nga forcat serbe në mars të vitit 1999. Përkujtime të tilla vazhdojnë të jenë një thirrje për drejtësi dhe për të mos harruar sakrificën e popullit të Kosovës për liri./Arbresh.info/