Deputeti i Lidhjes Demokratike të Kosovës (LDK), Avdullah Hoti ka pyetur se çka po ndodh me prokurorimin publik në Kosovë në vitet e fundit.

Sipas tij, tenderët njëburimor janë rritur si kurrë më parë, shkruan Arbresh.info.

Hoti me anë të një postimi në Facebook, ka thënë se raporti i BE-së thekson se 21% e prokurimeve janë kryer përmes negocimit pa procedurë të hapur tenderuese.

“Vlera e kontratave të nënshkruara me negocim është 78 milionë euro, apo 14% e gjithë vlerës së kontratave të nënshkruara. Me siguri shumë të madhe, shteti po paguan më shtrenjtë krahasuar me tenderimin e hapur me shumë oferta.”, ka shkuar Hoti.

Ndër të tjera  ai ka theksuar se numri i ankesave që ofertuesit dorëzojnë në Organin Shqyrtues të Prokurimit është shumë i lartë, rreth 1,200 ankesa brenda vitit.

“Shumë prej ankesave miratohen, duke i detyruar institucionet publike të rivlerësojnë ofertat, apo të anulojnë aktivitetin e prokurimit. Pasojat e kësaj janë investimet kapitale më të ulëta historikisht në Kosovë. Është e pakuptueshme që nuk aktivizohet plotësisht prokurimi elektronik i instaluar që nga Qeveria Mustafa, i cili duhet të lidhet me të gjitha sistemet në institucione të ndryshme për të siguruar transparencën e plotë.”, u shpreh ai.

Deputeti opozitar përmedni dy gjëra që është tepër e nevojshme.

“Prandaj, është tepër e nevojshme që: (i) fillimisht të ndërmerret një auditim gjithëpërfshirës për këtë problematikë, si dhe (ii) të aktivizohen mekanizmat e hetimit parlamentar për të ekzaminuar këtë problem, i cili potencialisht po i kushton buxhetit miliona euro humbje.”, ka shkruar ai./Arbresh.info/