Deputeti nga Lidhja Demokratike e Kosovës (LDK), Avdullah Hoti ka pritur në takim misionin e Fondit Monetar Ndërkombëtar që po qëndron në Kosovë.

Hoti përmes një postimi në Facebook, njoftoi se është diskutuar për situatën ekonomike në vend, shkruan Arbresh.info.

“Vitin e kaluar Kosova ka përjetuar krizën më të madhe të dekadës së fundit, të shkaktuar nga inflacioni i lartë dhe kriza energjetike. Kjo krizë ka shkaktuar një tronditje në jetën e qytetarëve dhe në kostot e bizneseve.”, ka shkruar Hoti.

Tutje, deputeti opozitar ia ka prezantuar delegacionit qëndrimin e LDK-së lidhur me zhvillimet ekonomike aktuale dhe të pritshme.

“Shpreha shqetësimin tonë si parti e djathtë, që mbështet konkurrencën e lirë dhe biznesin privat, për përkeqësimin e strukturës së buxhetit shtetëror, konkretisht për rënien e investimeve kapitale nga 23% në 15% të buxhetit, si dhe për rritjen e shpenzimeve për subvencione dhe transfere nga 32% në 42% të buxhetit. Një strukturë e tillë e buxhetit nuk e ndihmon ekonominë të përballet me sfidat nëpër të cilat po kalojmë.”, tha ai.

Ndër të tjera Hoti njoftoi se ka shprehur shqetësimet lidhur me vonesat në emërimin e Guvernatorit të Bankës Qendrore, Bordit të Trustit Pensional, Komisionin për Ndihmë Shtetërore dhe trupave të tjerë shtetërorë të rëndësishëm për mbarëvajtjen e ekonomisë.

“Institucionet tona duhet të bashkëpunojnë ngushtë me FMN-në. Reformat kryesore ekonomike duhet të diskutohen gjerësisht me FMN-në dhe misionin që mbulon Kosovën. Përvoja e tyre është globale dhe, rrjedhimisht, shumë e vlefshme për vendimmarrjen e institucioneve të Kosovës.”, shkroi ndër të tjera deputeti Hoti./Arbresh.info