Para 32 vjetëve në Kosovë lindi partia e parë politike pluraliste, që u emërtua Lidhja Demokratike e Kosovës (LDK).

Nënkryetari aktual i kësaj partie, Lutfi Haziri, tha se qysh në dekadën e parë nga kjo parti u larguan shumë prej themeluesve të saj.

“Partia Fshatare, Partia Socialdemokrate më pas. Ukshin Hoti më pas themeloi UNIKOMBIN si alternativë ndaj LDK-së, që ishte poashtu ndër kuadrot e para të LDK-së, deri te ndarja ideologjike e partisë nga ata që njiheshin si të burgosurit politikë”.

Haziri thotë se partia megjithatë pas luftës u përball me reforma të reja, ribrendim e rithemelim.

“Pas lufte, LDK-ja ishte si parti e paorganizuar dhe shkapërderdhur totalisht. Kryengritja e armatosur e kishte shuar LDK-në si nevojë të kohës. Deri në zgjedhjet e para lokale, LDK-ja ishte një parti që e kishte bluar koha për 18 muaj të luftës në Kosovë”, tha ai në RTV Dukagjini.

Ai tha se reformatimi i pasluftës ishte proces i dhimbshëm për LDK-në.

“U largua Milazim Krasniqi dhe një pjesë e intelektualëve nga LDK-ja. Deri më tani, 13 parti politike janë themeluar nga daljet nga LDK-ja”, deklaroi tutje Haziri./Telegrafi