Kryetarja e Kuvendit të Kosovës, Albulena Haxhiu, ka reaguar lidhur me vendimin për mbështetjen financiare të ekspozitës “Masakrat në Kosovë 1998–1999”, duke sqaruar se ky vendim është marrë në përputhje me procedurat dhe rregulloren në fuqi.

Sipas saj, vendimi është votuar në Kryesinë e Kuvendit dhe ka marrë mbështetjen e të gjithë anëtarëve, me përjashtim të përfaqësuesve të Listës Serbe.

Megjithatë, Haxhiu ka shprehur keqardhje për situatën e krijuar, duke theksuar se ndjen obligim institucional dhe moral për reagim.

Postimi i plotë:

Vendimi për mbështetjen financiare të ekspozitës është marrë në Kryesinë e Kuvendit, në përputhje të plotë me Rregulloren për subvencionim.

Përveç përfaqësuesve të Listës Serbe, të gjithë anëtarët e tjerë kanë votuar në favor të këtij vendimi.

Si Kryetare e Kuvendit, ndjej obligim institucional dhe moral të shpreh keqardhjen time për situatën e krijuar.

Kryesia ka vepruar mbi bazën e informacionit të paraqitur në atë kohë dhe nuk ka pasur indikacione për pasaktësi. Njëkohësisht, duhet theksuar se verifikimi i të dhënave nuk bie në kompetencat e drejtpërdrejta të Kryesisë.

Mbështetja për këtë ekspozitë është dhënë me qëllim të mirë. Megjithatë, ky rast përbën një moment të rëndësishëm reflektimi institucional.

Në këtë drejtim, do të ndërmarrim hapa konkretë për të forcuar mekanizmat e vlerësimit, përmes themelimit të komisioneve të posaçme profesionale dhe ndryshimit të Rregullores ekzistuese, me qëllim fuqizimin e kritereve dhe rritjen e transparencës dhe llogaridhënies në vendimmarrje./Arbresh.info