Sot, në 27-vjetorin e masakrës së Izbicës, kryetarja e Kuvendit të Kosovës, Albulena Haxhiu, qëndroi në këtë fshat për të kujtuar dhe nderuar 147 shqiptarët e vrarë nga forcat policore, ushtarake e paramilitare të Serbisë.

Pasi bëri homazhe dhe vendosi lule pranë lapidarit, kryetarja Haxhiu e cilësoi Masakrën e Izbicës si njërën nga plagët më të rënda të luftës në Kosovë, njofton zyra për informim e Kuvendit.

Në këtë masakër, ndër 147 të vrarët, përkujtoi kryetarja Haxhiu, ishte edhe Dafina Qelaj, vetëm gjashtë muajshe. Ajo u vra më 28 mars 1999, së bashku me burra, gra, të moshuar dhe fëmijë të tjerë, civilë të pafajshëm që u shënjestruan vetëm pse ishin shqiptarë.

“Sot, 27 vjet më pas, e kujtojmë me nderim të thellë Masakrën e Izbicës, një nga plagët më të rënda të luftës në Kosovë. Në përpjekje për t’i fshehur gjurmët e krimit, regjimi gjenocidal i Serbisë i varrosi viktimat në varreza masive në Petrovo Selo, në Beograd, si dhe në Novolan dhe në Bistricë. Por e vërteta e tyre jeton. I përjetshëm qoftë kujtimi për të rënët për liri”, tha kryetarja Haxhiu.