Ambasadori i Mbretërisë së Bashkuar në Kosovë, Jonathan Hargreaves, ka uruar Qeverinë e re të Kosovës pas formimit të saj, duke shprehur gatishmërinë për bashkëpunim të ngushtë me kryeministrin Albin Kurti dhe kabinetin e ri qeveritar.

Hargreaves ka theksuar se një Kuvend dhe Qeveri funksionale janë thelbësore që Kosova të përparojë në çështjet që kanë rëndësi për qytetarët e saj.

Ai ka bërë të ditur se Mbretëria e Bashkuar është e gatshme ta mbështesë Kosovën në avancimin e reformave, forcimin e institucioneve demokratike dhe në punën në interes të të gjitha komuniteteve.

Po ashtu, ambasadori britanik theksoi rëndësinë e vazhdimit të përkushtimit të Kosovës ndaj dialogut të lehtësuar nga Bashkimi Evropian, si dhe nxitjes së stabilitetit, prosperitetit dhe bashkëpunimit rajonal.