Kreu i Aleancës për Ardhmërinë e Kosovës (AAK), Ramush Haradinaj ka kujtuar 3 prillin e vitit 1999 ku në Kralan të Gjakovës, forcat kriminale të Millosheviqit masakruan 86 shqiptarë të pafajshëm – burra, gra, të rinj, e madje edhe fëmijë.

Ai tha se edhe sot e kësaj dite përgjegjësit për masakrën nuk janë vënë para drejtësisë, shkruan Arbresh.info.

“Po atë ditë, me pushkën e lirisë në dorë, ra heroikisht bashkëluftëtari Arton Mehmetaj – i treti dëshmor nga familja heroike Mehmetaj e Gllogjanit. Bashkë me të, përkrah njëri-tjetrit deri në frymën e fundit, ra edhe Halit Coka nga Kukësi. Kujtojmë me nderim të përjetshëm edhe trimat Visar Myftari, Fehmi Shala, Kujtim Qallakaj, Ilir Hoxha, Mustafë Çeku dhe shumë të tjerë, që me jetën e tyre shkruan historinë e lirisë së Kosovës.”, ka shkruar ai.

“Liria nuk na erdhi vetë, ajo u fitua me gjak e sakrificë ndër breza. Sot, dhe përherë, mbetet detyra jonë ta mbrojmë këtë liri, ta çojmë përpara Kosovën ashtu siç ëndërruan ata që dhanë jetën për të.”, u shpreh Haradinaj.

“Lavdi të rënëve për liri!”, tha ai./Arbresh.info/