Një delegacion i Kuvendit të Republikës së Kosovës është duke qëndruar në një vizitë zyrtare në Vjenë.

Delegacioni i Kuvendit të Republikës së Kosovës, në përbërje: Anton Quni, kryetar i Grupit të Miqësisë Kosovë -Austri në Kuvendin e Republikës së Kosovë, deputetët Luljeta Veselaj – Gutaj, Abdyl Ymeri, Ganimete Musliu, Nuredin Ibishi, Time Kadrijaj dhe Salih Salihu, po qëndron në Parlamentin e Austrisë, me ftesë të Kryetarit të Grupit të Miqësisë Austri – Kosovë në Parlamentin e Austrisë, Christoph Vavrik.

Siç njofton Zyra për Informim e Kuvendit të Kosovës, thellimi i bashkëpunimit mes dy vendeve në rrafshin  politik, shtrirja e këtij bashkëpunimi edhe në rrafshin ekonomik, çështja e zgjidhjes së kufirit me Malin e Zi, luftimi i korrupsionit nga institucionet në vend dhe mundësia e integrimit të Kosovës në BE dhe organizata ndërkombëtare, ishin temat e diskutimit.

Grupi i Miqësisë Kosovë-Austri kërkoi përkrahjen e shtetit Austriak në rrugën e Kosovës drejt integrimit në BE dhe organizata ndërkombëtare (NATO, UNESCO, OSCE dhe INTERPOL).

Lidhur me këtë, delegacioni nga Kosova mori mbështetjen e plotë nga homologët dhe përfaqësuesit austriak dhe njëkohësisht u siguruan që Austria do të përkrah politikisht Republikën e Kosovës në të gjitha iniciativat integruese.

Nga të dy palët u rikonfirmua miqësia mes dy shteteve dhe gatishmëria për të vazhduar dhe zgjeruar bashkëpunimin edhe në fushat tjera.