Në natën e 7 korrikut, qyteti i Lipjanit u trondit nga një ngjarje e rëndë, ku 27-vjeçari Agon Zejnullahu humbi jetën pas një ndërhyrjeje policore.

Rasti është cilësuar si vdekje e dyshimtë, ndërsa pesë zyrtarë policorë janë arrestuar dhe suspenduar nga detyra, nën dyshimin për “vrasje nga pakujdesia”.

Zëdhënësja e Prokurorisë Themelore, Kaltrina Shala, për “Arbresh.info” ka bërë me dije se prokuroria do të kërkojë caktimin e masës së sigurisë ndaj pesë policëve të përfshirë në rast.

Ndërsa zëdhënësja e Gjykatës Themelore në Prishtinë, Mirlinda Gashi, ka deklaruar se deri më tani nuk është pranuar asnjë kërkesë zyrtare nga prokuroria.

Ndryshe, ngjarja ndodhi pas mesnatës në rrugën “Haradin Bajrami” në Lipjan, ku policia kishte ndërhyrë pas një informacioni se Zejnullahu, dyshohet nën ndikimin e alkoolit, po sulmonte automjete dhe kalimtarë.

Policia njoftoi se njësitë e saj reaguan menjëherë për të vënë situatën nën kontroll, ndërsa në vendngjarje u thirr edhe ekipi mjekësor emergjent, i cili i ofroi ndihmën e parë 27-vjeçarit, por përkundër përpjekjeve, ai u konstatua i vdekur në vendin e ngjarjes./Arbresh.info

LEXO EDHE:

Vdekja e të riut nga Lipjani: Çfarë dihet deri tani