Gërvalla bën homazhe tek varrezat e vëllezërve Bytyqi në New York: Zbardhja e këtij krimi, plagë e hapur

16:24 | 29 Shtator 2024
E.H

Ministrja e Jashtme Donika Gërvalla, ka bërë homazhe tek varrezat e vëllezëve Bytyqi në New York.

Me anë të një postimi në Facebook, Gërvalla tha se vëllezërit Bytyqi janë dëshmi e fuqishme dhe kujtesë e përhershme e kontributit të pashembullt të mërgatës sonë për çlirimin e Kosovës dhe e krimeve të pandëshkuara të Serbisë.

“Bashkë me Kryeministrin Kurti, nderuam sakrificën e jashtëzakonshme të vëllezërve Agron, Mehmet dhe Ylli Bytyqi, shtetas amerikanë dhe djem të Kosovës që dhanë jetën për lirinë e Kosovës”, shkroi ajo.

“25 vite kanë kaluar por zbardhja e këtij krimi dhe dhënia e dënimit të merituar për përgjegjësit mbetet një plagë e hapur për Kosovën dhe Amerikën”, tha Gërvalla./Arbresh.info