Me gjysmë ore vonesë ka nisur sot seanca gjyqësore për rastin “Banjska” në Gjykatën Themelore në Prishtinë.

Gjatë kësaj seance pritet të dëgjohet dëshmia e zyrtarit policor, Mirsad Kryeziu.

Të akuzuar në këtë rast janë Blagoje Spasojeviq, Vladimir Toliq dhe Dushan Maksimoviq, të cilët janë në mesin e 45 personave të akuzuar për sulmin terrorist të udhëhequr nga Milan Radojiçiq, në të cilin u vra rreshteri i Policisë së Kosovës, Afrim Bunjaku.

Ndërsa vetëm tre prej të akuzuarve po gjykohen aktualisht nga drejtësia e Kosovës, 42 të tjerët, përfshirë edhe Milan Radojiçiqin — i cili publikisht ka pranuar se ka udhëhequr sulmin në Banjskë — ndodhen në arrati.

Më 11 shtator 2024, Prokuroria Speciale e Kosovës ka ngritur aktakuzë kundër 45 personave, të udhëhequr nga Radojiçiq, për vepra të rënda penale, përfshirë terrorizëm, financim të terrorizmit dhe vepra të tjera të ndërlidhura.

Autoritetet e Kosovës kanë kërkuar zyrtarisht ekstradimin e Milan Radojiçiqit dhe të akuzuarve të tjerë nga Serbia, por deri më tani nuk ka pasur ndonjë veprim konkret në këtë drejtim. Ata janë në kërkim ndërkombëtar përmes INTERPOL-it, ndërkohë që komuniteti ndërkombëtar ka shtuar presionin ndaj Serbisë për t’i dorëzuar drejtësisë së Republikës së Kosovës personat përgjegjës për këtë sulm terrorist.