Tash e sa ditë qytetarët e Kamenicës janë duke u përballur me probleme me ujin për pije. Për më tepër, ujërat e zeza të cilat mblidhen në këtë komunë po shkarkohen në lumin Krivareka i cili gjendet në mes të fshatit Koretin të kësaj komune. Era  kundërmuese në lumin e Koretinit po ngujon banorët brenda shtëpive.

Për këtë banorët e këtij fshati janë duke protestuar tash e sa ditë.

Në një prononcim dhënë për arbresh.info, shef i grupit të asamblistëve të VV-së në Komunën e Kamenicës, Afrim Dervishi, thotë se burimi i kësaj ndotje që kalon përmes lumit të fshatit Koretin, po kalon në helmim dhe e pamundëson jetën e banorëve.

“Ne si qytetarë të Koretinit dhe aktivist kemi ngritë shqetësimin tonë në vazhdimësi, edhe para meje të zgjedhurit në asamblenë komunale e kanë ngrit shqetësimin në forume të ndryshme, për gjendjen alarmante të ndotjes së lumit që kalon përmes fshatit. Burimi i krejt kësaj ndotje që është edhe në nivelin e helmimit është nga ujerat e zeza që derdhën mbi fshat, në lumin e fshatit dhe që kalon përmes fshatit. Aty derdhën krejt ujërat e zeza të qytetit dhe të Berivojcës, kjo në Koretin e bënë të pamundur sot jetën”, thotë Dervishi.

Ai thotë se kanë organizuar edhe protestë  për zgjedhjen e këtij problemi.

“Shumica e puseve të familjarëve janë afër lumit janë të rrezikuara nga ky nivel i madh i ndotjes, ne kemi ngritë shqetësimet dhe jemi organizuar si qytetarë të protestojmë deri në zgjidhjen e këtij problemi. Nga e hëna jemi vazhdimisht në proteste dhe jemi në analiza dhe organizime dhe duke mëndu se si kjo përfundimisht të na hiqet nga fshati”, thotë Dervishi.

Ndërsa sa i përket ankesave të cilat i kanë parashtruar, Dervishi thotë se ashtu si kryetarët e tjerë edhe Qëndron Kastrati vetëm po shkarkohen nga përgjegjësia, por nuk kanë seriozitet ta zgjidhin këtë problem që po i shkaktohet fshatit Koretin.

“Edhe Qëndron Kastrati, por edhe kryetarët para tij maksimumin e angazhimeve që e kanë pas kanë qenë me u shkarkua nga përgjegjësia dhe jo me e zgjidh problemin, ka kuptim që aj e bënë një shkresë ose ndonjë lutje, por asnjëherë në nivelin e seriozitetit për me e zgjidh problemin. Përderisa ai publikon projekte milionëshe për në infrastrukturë, në sheshe, nuk ka asnjë angazhim serioz për me e largu gjithë këtë të keqe që po na shkaktohet neve në Koretin”, deklaron Dervishi.

Ndotja dhe aroma e cila vije nga ujerat e zeza, po bëhet e papërballueshme për banorët e këtij fshati

Një banorë nga Koretini, Beqir Klaiqi, thotë se ky problem ka ekzistuar gjithmonë, por kohëve të fundit i është shtuar edhe aroma e keqe.

“Këtë lum e mbaj mend gjithmonë, ka pas probleme shumë me këtë lum, kohën e fundit kemi problem me aromën, pasi po vije nga ujerat e zeza të Kamenicës. Jemi të tmerruar. Ka pas grubetqarë që janë larguar për shkak të aromës së keqe. Kemi pasë dy ditë protesta, mirëpo nuk e di sa na realizohet kjo punë”, tha Klaiqi.

E nga problemet që ka me fytin, Gani Robelli, nga Koretini, e ka të pamundur të dal jashtë nga aroma e keqe e ujerave të zeza.

Ai gjithashtu tregoi për arbresh.info se asnjëherë nuk e kanë shfrytëzuar këtë ujë për pije.

“Shumë afër e kam lumin, prej Kamenicës ujerat e zeza na janë grumbulluar këtu, me mujt me i largu se po na pengon shumë, nuk guxojmë as me i hap derëtarët. Katundi janë dal në protestë dy ditë, unë kam qenë të mjeku s’kam mujt me dal. Qe pese vite marrim ujë në Kikë, nuk e përdorim këtë ujë hiç sepse nuk guxojmë me e pi. Unë për vete nuk guxojë të dal shumë në katund”, tha ai.

E në komunën e Kamenicës thonë se kanë marr masat e duhura për këtë problem, dhe se janë duke kërkuar intervenim nga institucionet përkatëse.

Kryetari i kësaj komune, Qëndron Kastrati në një prononcim për arbresh.info, thotë se kjo vije si pasojë e kanalizimeve të Kamenicës të cilat derdhen në lumin e Koretinit.

“Janë dy çështje që vijnë nga i njëjti problem apo i njëjti shkak, para disa ditë në komunën e Kamenicës kemi pasur ujë të kontaminuar dhe fati që nuk ka pësu askush dhe që kanë ndërhy institucionet. Kjo është pasojë e kanalizimeve që derdhen në lumenj ku i njëjti problem është në fshatin e Koretinit”, është shprehur Kastrati.

Kastrati shton se kanë kërkuar edhe nga policia dhe prokuroria që të zhvillohen hetime rreth këtij rasti, pasi që në këtë fshat po krijohet një ambient i paqëndrueshëm.

“Ne kemi kërkuar edhe nga prokuroria edhe nga Policia që më zhvillu hetime në këtë rast sepse është shkaktuar një rrezik i shëndetit. Në koretin është duke u shkaktu një aromë një ambient i paqëndrueshëm ku në ndërkohë mundet me u përkap baktere viruse”, deklaron Kastrati.

E sa i përket zgjidhjes së kësaj çështje kryetari Kastrati thotë se duhet të bashkëpunim me Komunën e Ranillukut, e cila vlen në një shumë deri në 20 milionë euro, e që sipas tij është e papërballueshme për komunën.

“Për me e zgjidhe krejt këtë çështje ne duhet si komunë e Kamenicës dhe e Ranillukut me vepru së bashku në vlerë prej 15 deri në 20 milionë euro, këtë Komuna e Kamenicës nuk ka mundësi me e përballu vetë po besoj që Qeveria Kosovës”, thotë Kastrati.

Kastrati gjithashtu tha se janë në bashkëpunim me Ministrinë e Mjedisit dhe Planifikimit Hapësinorë për sanimin e problemit.

“Ne aktualisht jemi në kontakt me MMPH-në dhe me tjerat që me e bë një zgjidhje të përkohshme deri te zgjidhja e madhe e trajtimit të ujerave. Jam duke kontaktuar me Ministrin Matoshi, për me pa mundësin se si mundemi me e bë një zgjidhje deri të trajtohet çështja e rregullimit të urjave të zeza në Komunën tonë”,  shprehet Kastrati

Lumi Krivareka kalon nëpër qytet dhe në fshatrat Berivojcë, Koretin dhe Topanicë./E.Haxhiu/arbresh.info/