Qeveria e Kosovës në prag të muajit të gjashtë të saj po hynë pa u  kompletuar krejtësisht.

Nga 20 Ministri që  ka qeveria e kryeministrit Isa Mustafa, vetëm tri prej tyre janë të kompletuara me nga dy zëvendësministra. Ndërsa  vazhdojnë të jenë të pakompletuar në këtë pozitë nëpër disa Ministri.

Mos kompletimin e  kabinetit qeveritarë e ka pranuar edhe  zëvendësi i qeverisë së Kosovës, njëherësh  ministri i Punës dhe Mirëqenies Sociale, Arban Abrashi,  i cili për KosovaPress  në një përgjigje përmes mesazhit  telefonik përveç që ka konfirmuar mos kompletimin e kabinetit qeveritar ka thënë se kjo do të

ndodhë së shpejti.

“Emërimi i zëvendësministrave ende nuk është përfunduar, jemi në proces dhe presim që shumë shpejt të përfundojë”, ka qenë përgjigja e shkurtër e  Abrashit për KosovaPress.

Kjo vonesë për gati gjashtë muaj po vlerësohet si pjesë e pazareve politike të bëra në mes të PDK-së dhe LDK-së të cilat bashkë-qeverisin vendin.

Për Frashër Krasniqi nga Vetëvendosje, kjo qeveri  duke  u themeluar në bazë të  ndarjes së privilegjeve  dhe pozitave të caktuara,  padyshim që do të ndikojë edhe në ndarjen e pozitave të zëvendësministrave.

Krasniqi shkon më tutje,  duke thënë se ekziston një arsye e qartë pse po ndodh kjo zvarritje e përzgjedhjes së zëvendësministrave dhe e cila sipas tij lidhet me zgjedhjet që po ndodhin brenda  subjektit të kryeministrit Mustafa.

“Na e dimë që një prej arsye pse nuk po zgjedhën zëvendësministrat janë edhe zgjedhjet e brendshme në LDK e cila siç po raportohet edhe nga vet qoftë deputetë, qoftë figura të rëndësishme të LDK po i shantazhon anëtarët e subjektit të  vet me pozita të zëvendësministrit”, theksoi Krasniqi.

Ndërsa  Pal Lekaj nga Aleanca për Ardhmërinë e Kosovës, në një prononcim dhënë KosovaPress përveç  që ka thënë  ka thënë se  është praktik e Qeverisë që vendet e rezervuar t’i ketë për aktivistë të partive  politike dhe jo për profesionistë, mos kompletimi i kabinetit qeveritar tregon për mungesën e seriozitet që ka koalicioni qeverisës karshi qytetarëve.

Ndryshe Qeveria e Kosovës  ka gjithsej 20 ministri, duke përfshirë këtu edhe ministrat pa portofol. Ky  numër  i ministrive pati marrë kritika nga shoqëria civile  duke thënë se tejkalon nevojat që  ka Kosova si një vend i vogël e me pak banorë.