Një grup prej shtatë personash u arrestuan të hënën në një operacion të gjerë të zhvilluar nga Policia dhe Prokuroria, si të dyshuar per “planifikimin dhe kryerjen e vrasjes” së rreshterit Muhamed Lika.

Krimi besohet se u krye për motive që ndërlidhen me punën e tij zyrtare.

I dyshuari kryesor Rejhan Bela doli dje para gjykatës dhe ndaj tij u caktua masa e paraburgimit, ndërsa për gjashtë të tjerët u kërkua e njëjta masë sigurie dhe sot mbahet seanca dëgjimore në Gjykatën Themelore në Ferizaj.

Dosja e Prokurorisë ka zbuluar detaje nga ekzekutimi i Muhamed Likës, natën e 1 prillit, te ndërtesa ku jetonte në Kaçanik, derisa po kthehej nga puna, transmeton Klankosova.

Rreth orës 23:00, në Kaçanik, në katin e dytë të banesës, i dyshuari Bela që në kohën e kryerjes së veprës penale ka qenë i mitur, në bashkëkryerje me të dyshuarit tjerë, dyshohen se me dashje dhe planifikim paraprak, kanë privuar nga jeta zyrtarin policor Lika.

Sipas Prokurorisë, polici i ndjerë ishte përcjellë në vazhdimësi nga të dyshuarit derisa është futur në objektin e ndërtesës, e më pas nga mbrapa Bela ka shkuar dhe ka shtënë me armë zjarri në drejtim të tij.

Bazuar në ekzaminimet e kryera në vendin e ngjarjes, polici është gjuajtur me katër plumba dhe si pasojë e plagëve të rënda që ka pësuar, nuk ka arritur të mbijetojë.

Në kërkesën e Prokurorisë është bërë e ditur se i mituri është larguar nga vendngjarja dhe është bashkuar me të dyshuarit e tjerë, ku dyshohet se njëri prej tyre është dëgjuar duke thënë “bravo, ik”, raporton Klankosova.tv.

Ndryshe, në konferencën e mbajtur dje nga Policia dhe Prokuroria, u bë e ditur se disa prej të dyshuarve kanë të kaluar kriminale.