Deputetja nga radhët e Partisë Demokratike të Kosovës (PDK) Blerta Deliu përmes një statusi në facebook ka reaguar në lidhje me zhdukjen e mostrave të Astrit Deharit në Institutin e Mjekësisë Ligjore.

Sipas Deliut dy muaj pas zhdukjes së mostrave të Astrit Deharit nën pushtetin qeverisës të Albin Kurtit dhe Albulena Haxhiut, kuptojmë nga një deputet i shumicës parlamentare se krerët e institucioneve kanë dijeni për përmbajtjen e kamerave të sigurisë në Institutin e Mjekësisë Ligjore.

“I bëjë thirrje prokurorisë që të veproj në mënyrë të pavarur, me efikasitet dhe profesionalizëm për të hetuar dhe zbardhur këto pretendime, e mos të smbrapset as përballë presioneve e kërcënimeve që mund t’i marrë nga ky pushtet, bartësit e të cilit, derisa janë të gatshëm që t’i kërcënojnë publikisht prokurorët në sallat e gjyqit (siç ndodhi para disa ditësh), mund të bëjnë gjithçka jashtë tyre”, ka shkruar Deliu.

Deliu ka kërkuar dorëheqjen ose shkarkimin e Ministres së Drejtësisë, ku tha se është hapi i parë dhe i domosdoshëm për të mundësuar proces hetimor të pavarur e të besueshëm./arbresh.info