Kryeministri i Republikës së Kosovës, Isa Mustafa gjatë fushatës zgjedhore kishte premtuar se në kabinetin e tij qeveritar do të ketë më shumë femra, ndryshe prej qeverive paraprake.  Saktësisht numri që Mustafa kishte premtuar, në vitin 2014, ishte për gjashtë ministre.

“Së paku 6 vende do t’i rezervojmë për ministresha në Qeverinë e Kosovës”, kishte thënë ai gjatë një tubimi me gratë anëtare të Lidhjes Demokratike të Kosovës.

Por kjo nuk ndodhi në të realitet. Deputetja e PDK-së, Blerta Deliu-Kodra e kritikoi indirekt kryeministrin për këtë premtim të dhënë.

“Përbërja e Qeverisë, me vetëm dy ministre gra, njëra pa portofol , hedh poshtë premtimet e bëra nga shumë liderë aktual të skenës politike të cilët gjatë fushatës patën premtuar se në Qeverinë e re do të ketë më shumë gra”, ka deklaruar ajo gjatë një takimi   në konsultimet e Nivelit të Lartë rreth procesit të Integrimit Evropian dhe Barazisë Gjinore.