Ministri i Jashtëm i Serbisë, Ivica Daçiq, ka thënë se askush nuk ka kërkuar nga Serbia që ta ndërrojë qëndrimin në raport me Kosovën dhe sipas tij, marrëveshjet e arritura dhe respektimi i tyre nga Prishtina dhe Beogradi, nuk do të thonë njohje e Kosovës.

“Nuk është kërkuar nga Serbia që ta ndërrojë qëndrimin mbi Kosovën dhe marrëveshjet e arritura për normalizimin e marrëdhënieve mes Beogradit dhe Prishtinës nuk do të thonë njohje e Kosovës”, ka thënë ai për Radio Beogradin, transmeton KosovaPress.

Sa i përket anëtarësimit të Serbisë në BE, Daçiq ka thënë se “Serbia do të bëj çdo gjë në mënyrë që, më së largu deri në vitin 2018 apo 2019, të përfundoj negociatat me BE-në, kështu që BE-ja të marrë një vendim për anëtarësimin e plotë të Serbisë”.

Ai, po ashtu, ka thënë se i gjithë progresi drejt anëtarësimit varet nga progresi që do të arrihet në përmbushjen e Kapitullit 35, që fokus ka normalizimin e marrëdhënieve me Prishtinën, duke shtuar “edhe Evropa vetë nuk e ka të qartë se çfarë ky kapitull do të thotë”.