Në kuadër të vizitës zyrtare në Oslo, Ministri i Integrimit Evropian, Bekim Çollaku është pritur sot në takim nga ministri për Zonën Ekonomike Evropiane dhe për Çështje të BE-së dhe njëherit Shefi i Stafit të kryeministrit të Norvegjisë, Vidar Helgesen.

Çollaku ka falënderuar shtetin e Norvegjisë për mbështetjen që i ka dhënë në vazhdimësi shtetit të Kosovës si dhe e ka njoftuar ministrin Helgesen për zhvillimet e fundit në Kosovë si dhe me progresin e shënuar në procesin e integrimit evropian.

“Ministri Çollaku e ka informuar ministrin Helgesen për procesin e Marrëveshjes së Stabilizim Asociimit dhe për arritjet në procesin e liberalizimit të vizave me qëllim që qytetarëve të Kosovës tu mundësohet lëvizja e lirë pa viza në BE dhe zonën Schengen”, thuhet në njoftimin e Ministrisë së Integrimeve Evropiane.

Në këtë njoftim thuhet se dy ministrat kanë diskutuar për mundësitë e thellimit të bashkëpunimit bilateral mes të dyja shteteve si dhe për përkrahjen zhvillimore që mund t’i ofrohet Kosovës nga Norvegjia.