Çeku: Komuna e Prishtinës qëllimshëm po lidh kontrata të kundërligjshme

12:02 | 16 Prill 2025
E.G

Ministri në dorëheqje i Kulturës, Hajrulla Çeku, ka pretenduar se Komuna e Prishtinës po lidh, qëllimisht, kontrata të kundërligjshme.

Ai ka përmendur veprimtaritë në sheshin “Xhorxh Bush”, rrugën “Rexhep Luci”, “Ishullin Urban” dhe projektin në rrugën “Agim Ramadani”.

Sipas Çekut, kjo përbën një shkelje serioze, e cila shoqërohet me përsëritje të metodave të veprimeve nga ana e Komunës.

“Këto kontrata janë të lidhura kundërligjshëm, duke mos i respektuar procedurat e nevojshme për pajisje me leje dhe pëlqime të nevojshme. Të gjitha këto investime realizohen brenda zonave të mbrojtura të trashëgimisë kulturore dhe ligji kërkon që para se të shpallen procedurat e të lidhen kontratat, duhet të pajisen me pëlqime përkatëse nga autoritetet përkatëse”, ka thënë ai./Arbresh.info/