Pas vendimit të KQZ-së për rinumërimin e 50 vendvotimeve, 35 prej të cilave vetëm në Vushtrri, Eugen Cakolli nga Instituti Demokratik i Kosovës thotë se edhe nëse nuk vërtetohet në asnjë komunë tjetër, ky rast tregon se problemi nuk qëndron as tek mënyra dhe as tek vendndodhja e numërimit, por tek ata që numërojnë dhe procesojnë rezultatet.

Sipas tij, në vitin 2023, partitë politike ishin pajtuar që numërimi i votave të zhvendosej në qendrat komunale të numërimit, për të shmangur manipulimet nga komisionerët. Megjithatë, thotë ai, pavarësisht kamerave, televizorëve, vëzhguesve, kostos dukshëm më të lartë dhe vonesave në përpunimin e rezultateve, këto zgjedhje po tregojnë se problemi vazhdon.

“Nga rinumërimi i votave të kandidatëve të LDK-së në Vushtrri, vetëm në 15 nga 96 vendvotimet e kësaj komune, nuk ka pasur dallime në vota. Ndërkaq, në plot 35 vendvotime, diferencat janë mbi 10 vota”, ka shkruar ai.

Cakolli thotë se është e domosdoshme që të largohet numërimi dhe përpunimi manual i votave.

“Një zgjidhje mund të jetë digjitalizimi i numërimit përmes skanimit të fletëvotimeve, të plotësuara me kimik unik – opsion që garanton integritetin, por edhe shpejtësinë e procesit”, shkroi ai./Arbresh.info/