Zëvendëskryeministri Besnik Bislimi, mirëpriti në takim Përfaqësuesin Special të Norvegjisë për Ballkanin Perëndimor, Haakon Blankenborg.

Palët diskutuan mbi situatën aktuale në vend, ku zëvendëskryeministri Bislimi e njohu Blankenborgun me punën e Qeverisë në kontekst të zhvillimit të vendit në rrafshin ekonomik, duke veçuar dhe të dhënat më të fundit që tregojnë për ulje të papunësisë në tremujorin e fundit të vitit 2023, nga 11.8% sa ishte në të njëjtën periudhë të vitit paraprak, në 10.7%, përcjell Arbresh.info

“Zëvendëskryeministri shtoi se këto rezultate të arritura në rritjen e punësimit dhe zhvillimit ekonomik në tërësi, në tri vitet e fundit, janë histori suksesi e shtetit tonë dhe projektim premtues për të ardhmen e vendit, dëshmuar dhe nga rankimet pozitive në indekset ndërkombëtare”, thuhet në njoftimin e ZKM-së.

Më tej, ata biseduan dhe mbi zhvillimet në rajon e procesin e dialogut.

Bislimi e falënderoi Përfaqësuesin Special të Norvegjisë për Ballkanin Perëndimor, Haakon Blankenborg, për bisedën e zhvilluar dhe takimin e frytshëm e produktiv./Arbresh.info