Me urdhër të Prokurorisë Speciale të Kosovës është ndaluar për 48 orë personi me inicialet V.E., nën dyshimin për kryerjen e veprave penale “Falsifikim i dokumenteve” dhe “Pjesëmarrja ose organizimi i grupit kriminal”.

I dyshuari është arrestuar të shtunën në mbrëmje në pikën kufitare të Bërnjakut, në kuadër të hetimeve të zgjeruara që lidhen me rastin e janarit të këtij viti, kur autoritetet kishin zbuluar një laborator të specializuar për falsifikim dokumentesh.

Prokuroria Speciale ka paraqitur kërkesë për caktimin e masës së paraburgimit ndaj të dyshuarit në Gjykatën Themelore në Prishtinë.

Sipas njoftimit, ekziston dyshimi i bazuar se V.E., në bashkëpunim me persona të tjerë, ka vepruar si grup i organizuar dhe ka prodhuar e shpërndarë dokumente të falsifikuara të rreth 50 shteteve të botës, nga një periudhë e pacaktuar e deri më 24 janar 2025.

Prokuroria Speciale, në bashkëpunim me hetuesit e Drejtorisë për Hetimin e Krimeve Ekonomike dhe Korrupsionit, ka bërë të ditur se po ndërmerren të gjitha veprimet e nevojshme hetimore në përputhje me Kodit e Procedurës Penale të Republikës së Kosovës.