Policia e Kosovës ka bërë të ditur se janë arrestuar pesë persona të dyshuar për ‘mundësim ose detyrim në prostitucion’, ‘ofrim i lokaleve për prostitucion’ dhe ‘marrje me prostitucion’.

Në njoftim të Policisë thuhet se pas një hetimi disamujor në një operacion policor, Policia e Kosovës, konkretisht Drejtoria për Hetimin e Trafikimit me Qenie Njerëzore, me datën 10 gusht 2016, rreth orës 23:30, ka arritur të arrestojë pesë persona të dyshuar, nën dyshimin e bazuar se janë të involvuar në  ‘mundësim ose detyrim në prostitucion’, ‘ofrim i lokaleve për prostitucion’ dhe ‘marrje me prostitucion’.

Operacioni është realizuar në një lokacion të Gjilanit, me ç’rast janë arrestuar të dyshuarit me inicialet: A.B (1978), F.B (1992), I.F (1987), D.K (1980), V.D (1983).

Në njoftim thuhet se me vendim të prokurorit të Prokurorisë Themelore në Prishtinë, i dyshuari i parë është ndaluar për 48 orë, i dyshuar për kryerje të veprës penale ‘mundësim ose detyrimi në prostitucion’, ‘ofrim i lokaleve për prostitucion’ dhe ‘marrje me prostitucion’, kurse për katër të dyshuarit tjerë është bërë kërkesë për fillimin e procedurës kundërvajtëse, në procedurë të shpejtë, në Gjykatën Themelore në Gjilan.