Lënda e rastit të Sami Lushtakut dhe ish- zyrtarëve të Shërbimit Korrektues të Kosovës, tashmë  i është dorëzuar Gjykatës Themelore në Prishtinë.

Zëdhënësja e Gjykatës Themelore në Prishtinë, Mirlinda Gashi ka thënë për Arbresh.info se kjo lëndë i është dorëzuar gjyqtarit të rastit dhe është në pritje të caktimit të seancës fillestare.

“Ju njoftojmë se lënda në fjalë është lëndë e re e arritur në Gjykatë dhe gjyqtari i kësaj çështje akoma nuk ka ndërmarrë ndonjë veprim lidhur me këtë rast”, është shprehur Gashi për Arbresh.info.

Prokurori i EULEX-it në Prokurorinë Speciale të Kosovës, në nëntor të vitit të kaluar ka ngritur aktakuzë ndaj 24 personave për arratisjen e Sami Lushtakut nga QKUK-ja në shtator të vitit 2015.

Në mesin e të akuzuarve janë edhe vet kreu i  komunës së Skenderajt Sami Lushtaku, djali i tij, Mërgim Lushtaku dhe 22 persona të tjerë, përfshirë zyrtarë të lartë të Ministrisë së Drejtësisë, gardianë, biznesmenë e bashkëpunëtorë të Lushtakut ./Arbresh.info/ G. Lushi