Partia Demokratike e Kosovës ka iniciuar sot Projektligjin për rregullimin e çmimit të barnave.

Deputeti Uran Ismaili ka thënë se ky ligj e mbron gjepin e qytetarëve dhe kthen dinjitetin e farmacistëve të Kosovës.

“Në maj të vitit 2019 si ministër i Shëndetësisë pata nënshkruar udhëzimin administrative për rregullimin e barnave me qëllim që njëherë e përgjithmonë të ndalohet abuzimi me çmime të barnave, për mua dhe qytetarëve të Kosovës implementimi i këtij udhëzimi ka qenë çështje e mbyllur, fatkeqësisht edhe pse u nënshkrua implementimi nuk ndodhi asnjëherë. Përkundrazi pamë kontrata që nënshkruheshin me çmime deri në 2 mijë për qind më të shtrenjta, por edhe pamë qytetarët tanë që ilaçet e 20 eurove i blinin nga 200-300 euro. Fillet e pengesave për këtë u panë në qeverinë Kurti 1, eskaloi në qeverinë Hoti që anuloi udhëzimin dhe pas presionit publik e pezulloi zbatimin e tij”, ka thënë Ismaili.

Ministri i Shëndetësisë, Arben Vitia, ka thënë se e mirëpret nismën e Uran Ismajlit, deputetit të Partisë Demokratike të Kosovës, për ligjin e rregullimit të çmimit të barnave.

Vitia në seancën e Kuvendit ka deklaruar se do të punojë bashkë me Qeverinë dhe Kuvendin për të rregulluar një herë e mirë këtë ligj./arbresh.info/