Asociacioni i Gazetarëve të Kosovës shpreh shqetësimin lidhur me kërkesën e disa anëtarëve të Këshillit Prokurorial të Kosovës që të kufizojnë qasjen e gazetarëve dhe publikimin e materialeve nga mbledhjet e KPK-së.

Kërkesat në mbledhjen e fundit të këtij këshilli për mundësinë e kufizimit të qasjes së mediave dhe shoqërisë civile në mbledhjet, të cilat sipas ligjit janë të hapura për publikun, i konsiderojmë si tendencë për të censuruar fjalën e lirë dhe pengimin e shpërndarjes së informacionit përmes medieve që është në interes të publikut.

AGK i bën thirrje anëtarëve të Këshillit Prokurorial të Kosovës të heqin dorë nga çfarëdo kërkese që pengon punën e gazetarëve, dhe t’iu mundësoj të gjitha palëve qasje të plotë dhe transparencë në aktivitetet e KPK-së.

Njëherësh rikujtojmë se liria e shprehjes dhe liria e medias janë të drejta dhe liri të cilat garantohen me Kushtetutën e Republikës së Kosovës.