Aktorja e njohur njëherësh edhe deputetja e Kuvendit të Kosovës, Adriana Matoshi tash e sa ditë po mbështet fushatën “Besa-Besë” për bojkotimin prodhimeve serbe dhe fuqizimin e prodhimeve vendore.

Matoshi me anë të një postimi në InstaStory në natën e ndërrimit të motmoteve, ka kërkuar nga ndjekësit e saj të anashkalojnë çdo produkt me barkodin 860, që identifikon produktet serbe.

“Në prag të festave fluksi është shumë i madh në marketet tona. Krejt çka mundemi të bëjmë është të bojkotojmë prodhimet serbe. Bëjeni ligj në kokën tuaj, mos blini pa e parë se çfarë po blini. Thjesht anashkaloni 860”, ka shkruar Matoshi.

Teksa ka shpërndarë logon e fushatës “Besa-Besë” me thirrjen “Mos bli prodhime serbe”, Matoshi ka kujtuar se sa i kërcënuar ndjehet presidenti serb për dobësimin ekonomik të vendit të tij.

“Qysh u pat qart Vuçiqi, ju lutem mos na bëni këtë gjë se vdesim urie”, ka kujtuar deputetja e VV-së në InstaStory./arbresh.info/