Kreu i Lidhjes Demokratike të Kosovës (LDK), Lumir Abdixhiku ka njoftuar se sot ka pritur Ambasadorin e Gjermanisë, Jorn Rohde.

Gjatë takimit, u diskutua mbi zhvillimet e fundit politike në vend, me fokus të veçantë në situatën e krijuar nga ngërçi institucional shkruan Arbresh.info.

Abdixhiku e ka bërë përgjegjëse VV-në e cila, sipas tij, po e mban peng funksionalizimin e institucioneve.

“Kryetari Abdixhiku theksoi rëndësinë e respektimit të Kushtetutës së Republikës së Kosovës. Në këtë kontekst ai foli për papërgjegjshmërinë e partisë së parë dhe mungesën e vullnetit politik, në mbajtjen peng të funksionalizimit të institucioneve të vendit. Kjo sjellje jo vetëm që dëmton besimin qytetar, por edhe cenon parimet themelore të demokracisë dhe respektimit të rendit kushtetues.” thuhet në njoftimin e LDK-së.

Abdixhiku shprehu mirënjohje për përkrahjen e vazhdueshme që Gjermania ka dhënë dhe vazhdon të japë për Kosovën, në të gjitha fazat e zhvillimit dhe konsolidimit demokratik të saj./Arbresh.info/