Kryetari i Lidhjes Demokratike të Kosovës (LDK), Lumir Abdixhiku këtë të diel ka marrë pjesë në aktivitetet e Forumit të Gruas.

Me anë të një postimi në Facebook, Abdixhiku tha se këtë herë kanë folur për pavarësinë ekonomike të gruas dhe edukimin e aftësimin profesional si mjet drejt arritjes së këtij qëllimi, shkruan Arbresh.info.

“Si parti e qendrës së djathtë, ne besojmë në lirinë ekonomike të gruas; besojmë në përgjegjësi të barabartë e në përpjekje të përbashkët në krijimin e një shoqërie që i gërsheton vlerat tona tradicionale me kohët moderne. Ky është misioni ynë ideologjik.”, ka shkruar ai.

Më tej ai shtoi se LDK beson në krijimin e hapësirës për gruan.

“Si organizim politik, besojmë në nevojën për krijimin e hapësirës së nevojshme për ekselencë për gruan që aktivizimin politik e ka përkushtim. Dhe LDK mbetet prijetare në këtë drejtim; jo me fjalë, por me shembuj përplot në qeverisje lokale e partiake gjithandej në Kosovë.”, ka shtuar kreu i LDK-së.

“Le të jetë kjo një ftesë për bashkim për secilën që ka të njëjtin dedikim. Rruga e Re dhe Kosova ka nevojë për ju!”, përfundoi ai./Arbresh.info/